Act 9 | GerLut1545lh | e4.org | S Aulus aber ſchnaubete noch mit drewen vnd morden / wider die Jünger des HErrn / Vnd gieng zum Hohenprieſter /

‏ Acts 9

1 SAulus aber ſchnaubete ^{▼▼War hefftig ſtürmiſch / vnd ſprüete.} noch mit drewen vnd morden / wider die Jünger des HErrn / Vnd gieng zum Hohenprieſter / 2 vnd bat jn vmb Brieue gen Damaſcon an die Schulen / Auff das / ſo er etliche dieſes weges fünde / Menner vnd Weiber / er ſie gebunden fürete gen Jeruſalem. 3 Vnd da er auff dem wege war / vnd nahe bey Damaſcon kam / vmbleuchtet jn plötzlich ein Liecht vom Himel / 4 vnd fiel auff die erden / vnd höret ein Stimme / die ſprach zu jm / Saul / Saul / was verfolgeſtu mich? 5 Er aber ſprach / HErr / Wer biſtu? Der HErr ſprach / Jch bin Jheſus / den du verfolgeſt ^{▼▼Paulus ſine operibus vocatus.}? Es wird dir ſchweer werden wider den Stachel lecken. 6 Vnd er ſprach mit zittern vnd zagen / HErr / was wilt du das ich thun ſol? Der HErr ſprach zu jm / Stehe auff / vnd gehe in die Stad ^{▼▼Paulus vocatus et illuminatus / tamen ad Ananiam mittitur / vt teſtes habeat etc.} / da wird man dir ſagen / was du thun ſolt. ^d; Jnf. 22. 7 DJe Menner aber / die ſeine Geferten waren / ſtunden vnd waren erſtarret / Denn ſie höreten ſeine ſtimme vnd ſahen niemands. 8 Saulus aber richtet ſich auff von der erden / vnd als er ſeine augen auffthat / ſahe er niemands. Sie namen jn aber bey der hand / vnd füreten jn gen Damaſcon / 9 vnd war drey tage nicht ſehend / vnd aſſ nicht vnd tranck nicht. 10 ES war aber ein Jünger zu Damaſco mit namen Ananias / Zu dem ſprach der HErr im geſichte / Anania. Vnd er ſprach / Hie bin ich HErr. 11 Der HErr ſprach zu jm / Stehe auff / vnd gehe hin in die Gaſſen / die da heiſſet die Richtige / vnd frage in dem hauſe Juda nach Saulo mit namen von Tarſen / denn ſihe er betet. 12 Vnd hat geſehen im Geſichte einen Man / mit namen Ananias / zu jm hin ein komen / vnd die hand auff jn legen / das er wider ſehend ^{▼▼Non ergo mitti tur / vt vocetur ſed ſanetur.} werde. 13 Ananias aber antwortet / HErr / Jch hab von vielen gehöret von dieſem Manne / wie viel vbels er deinen Heiligen gethan hat zu Jeruſalem / 14 Vnd er hat allhie macht von den Hohenprieſtern / zu binden alle die deinen Namen anruffen. 15 DEr HErr ſprach zu jm / Gehe hin / Denn dieſer iſt mir ein auſſerwelt Rüſtzeug / das er meinen Namen trage fur den Heiden / vnd fur den Königen / vnd fur den kindern von Jſrael / 16 Jch wil jm zeigen / wie viel er leiden mus vmb meines Namen willen. 17 Vnd Ananias gieng hin vnd kam in das Haus / vnd leget die hende auff jn / vnd ſprach / Lieber bruder Saul / Der HErr hat mich geſand / der dir erſchienen iſt auff dem wege / da du her kameſt / Das du wider ſehend / vnd mit dem heiligen Geiſt erfüllet werdeſt. 18 Vnd alſo bald fiel es von ſeinen augen / wie Schupen / vnd ward wider ſehend. 19 Vnd ſtund auff / lies ſich teuffen / vnd nam Speiſe zu ſich / vnd ſtercket ſich. SAVlus aber war etliche tage bey den Jüngern zu Damaſco / 20 vnd als bald prediget er Chriſtum in den Schulen / Das derſelbige Gottes Son ſey. 21 Sie entſatzten ſich aber alle die es höreten / vnd ſprachen / Jſt das nicht der zu Jeruſalem verſtöret alle / die dieſen Namen anruffen / vnd darumb her komen / das er ſie gebunden füre zu den Hohenprieſtern? 22 Paulus aber ward je mehr krefftiger / vnd treib die Jüden ein / die zu Damaſco woneten / vnd bewerts / Das dieſer iſt der Chriſt. 23 VND nach viel tagen hielten die Jüden einen Rat zuſamen / das ſie jn tödten. 24 Aber es ward Saulo kund gethan / das ſie jm nachſtelleten. Sie hüteten aber tag vnd nacht an den Thoren / das ſie jn tödten. 25 Da namen jn die Jünger bey der nacht / vnd theten jn durch die mauren / vnd lieſſen jn in einem Korbe hin ab. ^f 26 DA aber Saulus gen Jeruſalem kam / verſuchte er ſich bey die Jünger zu machen / Vnd ſie furchten ſich alle fur jm / gleubeten nicht / das er ein Jünger were. 27 Barnabas aber nam jn zu ſich ^{▼▼Teſtimonium oportet habere propter falſos fratres.} / vnd füret jn zu den Apoſteln / vnd erzelet jnen / Wie er auff der ſtraſſen den HErrn geſehen / vnd er mit jm geredt / vnd wie er zu Damaſco den namen Jheſu frey geprediget hette. 28 Vnd er war bey jnen / vnd gieng aus vnd ein zu Jeruſalem / vnd prediget den Namen des HErrn Jheſu frey. 29 Er redet auch vnd befraget ſich mit den Griechen / Aber ſie ſtelleten jm nach / das ſie jn tödten. 30 Da das die Brüder erfuren / geleiten ſie jn gen Ceſarien / vnd ſchickten jn gen Tarſen. 31 SO hatte nu die Gemeine friede durch gantz Judea vnd Galilea vnd Samaria / vnd bawete ſich / vnd wandelte in der furcht des HErrn / vnd ward erfüllet mit troſt des heiligen Geiſtes. 32 Es geſchach aber / da petrus durchzoch allenthalben / das er auch zu den Heiligen kam / die zu Lydda woneten. 33 Da ſelbs fand er einen Man mit namen Eneas / acht jar lang auff dem Bette gelegen / der war Gichtbrüchig. 34 Vnd Petrus ſprach zu jm / Enea / Jheſus Chriſtus mache dich geſund / Stehe auff / vnd bette dir ſelber. Vnd alſo bald ſtund er auff. 35 Vnd es ſahen jn alle die zu Lydda vnd zu Sarona woneten / die bekereten ſich ^{▼▼Verbo / ſine lege et operibus.} zu dem HErrn. 36 ZV Joppe aber war ein Jüngerin ^{▼▼Erſt iſt ſie gleubig vnd eine Jüngerin / Darnach thut ſie viel guts.} / mit namen Tabea / welchs verdolmetſcht heiſſet ein Rehe / Die war vol guter werck vnd Almoſen die ſie thet. 37 Es begab ſich aber zu der ſelbigen zeit / das ſie kranck ward / vnd ſtarb. Da wuſſchen ſie dieſelbige / vnd legten ſie auff den Söller. 38 Nu aber Lydda nahe bey Joppen iſt / Da die Jünger höreten / das Petrus daſelbs war / ſandten ſie zu jm / vnd ermaneten jn / Das er ſichs nicht lieſſe verdrieſſen zu jnen zu komen. 39 PEtrus aber ſtund auff vnd kam mit jnen. Vnd als er dar komen war / füreten ſie jn hin auff auff den Söller / vnd tratten vmb jn alle Widwen / weineten vnd zeigeten jm die Röcke vnd Kleider / welche die Rehe machte / weil ſie bey jnen war. 40 Vnd da Petrus ſie alle hin aus getrieben hatte / kniet er nider / betet / vnd wandte ſich / zu dem Leichnam / vnd ſprach / Tabea / ſtehe auff. Vnd ſie that jre augen auff / vnd da ſie Petrum ſahe / ſatzte ſie ſich wider. 41 Er aber gab jr die hand / vnd richtet ſie auff / Vnd rieff den Heiligen vnd den Widwen vnd ſtellet ſie lebendig dar. 42 Vnd es ward kund durch gantz Joppen / vnd viel wurden gleubig ^{▼▼Verbo / ſine lege et operibus.} an den HErrn. 43 Vnd es geſchach / das er lange zeit zu Joppe bleib / bey einem Simon der ein Gerber war.