Hos 7 | GerLut1545lh | e4.org | W Enn ich Jſrael heilen wil / So findet ſich erſt die ſünde Ephraim / vnd die bosheit Samarie / wie ſie Abgötterey treiben. Denn wie wol ſie vnter ſich ſelbs mit Dieben / vnd auswendig mit Reubern geplagt ſind /

‏ Hosea 7

1 WEnn ich Jſrael heilen wil / So findet ſich ^{▼▼Je mehr man recht leret / je erger die welt wird.} erſt die ſünde Ephraim / vnd die bosheit Samarie / wie ſie Abgötterey treiben. Denn wie wol ſie vnter ſich ſelbs mit Dieben / vnd auswendig mit Reubern geplagt ſind / 2 Dennoch wöllen ſie nicht mercken / das ich alle jre Bosheit mercke. Jch ſehe aber jr weſen wol / das ſie allenthalben treiben. 3 SJe vertröſten den König durch jre Bosheit ^{▼▼Abgötterey.} / vnd die Fürſten durch jre lügen. 4 Vnd ſind alle ſampt Ehebrecher / Gleich wie ein Backofen den der Becker heitzet / wenn er hat ausgeknetet / vnd leſſt den Teig durchſeuren vnd auffgehen. 5 HEute iſt vnſers Königes Feſt / Da fahen die Fürſten an vom wein toll zu werden / So zeucht er die Spötter zu ſich. 6 Denn jr hertz iſt in heiſſer andacht / wie ein Backofen / wenn ſie opffern vnd die Leute betriegen / Aber jr Becker ^{▼▼Das iſt / jr König. Wil alſo ſagen / Sie brennen ſo heis in Abgötterey das ſie mit keiner Plage dauon zu bringen ſind. Ja ſie machen Marterer aus denen / ſo Gott ſtraffet / als leiden ſie es vmb Gottes willen / vnd Canoniſiern jr eigen Heiligen.} ſchlefft die gantze nacht / vnd des morgens brennet er liechter lohe. 7 Noch ſind ſie ſo heiſſer andacht / wie ein Backofen / Ob gleich jre Richter auffgefreſſen werden / vnd alle jre Könige fallen / Noch iſt keiner vnter jnen / der mich anruffe. 8 EPhraim menget ſich vnter die Völcker / Ephraim iſt / wie ein Kuche / den niemand vmbwendet ^{▼▼Leſſt ſich jmer braten auff einer ſeiten.}. 9 Sondern frembde freſſen ſeine krafft / Noch wil ers nicht mercken / Er hat auch grawe har krieget / Noch wil ers nicht mercken. 10 Vnd die hoffart Jſrael wird fur jren augen gedemütiget / Noch bekeren ſie ſich nicht zum HERRN jrem Gott / Fragen auch nicht nach jm in dieſem allen. 11 Denn Ephraim iſt / wie eine verlockte Taube / die nichts mercken wil / Jtzt ruffen ſie Egypten an / Denn lauffen ſie zu Aſſur. 12 Aber in dem ſie hin vnd her lauffen / wil ich mein Netze vber ſie werffen / vnd herunter rücken / wie die Vogel vnter dem Himel / Jch wil ſie ſtraffen / wie man predigt ^{▼▼Das iſt / ſie drewen vnd bannen die rechten Propheten / als Ketzer fur Gott etc. Dasſelb ſol auff jren Kopff fallen / vnd ſollen die ſtraffe die ſie predigen vber andere in jren Schulen etc. ſelbs tragen.} in jrer Samlung. 13 WEh jnen / das ſie von mir weichen / ſie müſſen verſtöret werden / Denn ſie ſind abtrünnig von mir worden / Jch wolt ſie wol erlöſen / Wenn ſie nicht wider mich lügen ^{▼▼Abgötterey.} lereten. 14 So ruffen ſie auch mich nicht an von hertzen / Sondern lören auff jren Lagern ^{▼▼Das iſt / Jn jren Kirchen vnd Schulen da ſie mit den Götzen bulen.}. Sie verſamlen ſich vmb Korn vnd Moſts willen ^{▼▼Das iſt / Sie gehen zu Chor vmb eſſen vnd trincken willen.} / vnd ſind mir vngehorſam. 15 Jch lere ſie / vnd ſtercke jren Arm / Aber ſie dencken böſes von mir. 16 Sie bekeren ſich / Aber nicht recht / Sondern ſind wie ein falſcher Boge / Darumb werden jre Fürſten durchs Schwert fallen / Jr drewen ^{▼▼Scilicet wider die Propheten.} ſol in Egyptenland zum ſpot werden.