Jos 13 | GerLut1545lh | e4.org | D A nu Joſua alt war vnd wolbetaget / ſprach der HERR zu jm / Du biſt alt worden vnd wolbetaget / vnd des Lands iſt noch faſt viel vbrig einzunemen /

‏ Joshua 13

1 DA nu Joſua alt war vnd wolbetaget / ſprach der HERR zu jm / Du biſt alt worden vnd wolbetaget / vnd des Lands iſt noch faſt viel vbrig einzunemen / 2 nemlich / das gantze Galilea der Philiſter / vnd gantz Geſſuri / 3 von Sihor an / der fur Egypten fleuſt bis an die grentze Ekron gegen mitternacht / die den Cananitern zugerechnet wird / fünff Herrn der Philiſter / nemlich / der Gaſiter / der Aſdoditer / der Aſkloniter / der Gethiter / der Ekroniter vnd die Auiter. 4 Von mittag an aber iſt das gantz Land der Cananiter / vnd Meara der Zidonier bis gen Aphek / bis an die grentze der Amoriter. 5 Da zu das Land der Gibliter / vnd der gantze Libanon / gegen der Sonnen auffgang / von BaalGad an / vnter dem berge Hermon / bis man kompt gen Hamath. 6 Alle die auff dem Gebirge wonen / von Libanon an / bis an die Warmewaſſer / vnd alle Zidonier / Jch wil ſie vertreiben fur den kindern Jſrael / Loſſe nu drumb ſie aus zuteilen vnter Jſrael / wie ich dir geboten habe. 7 SO teile nu dis Land zum Erbe vnter die neun Stemme / vnd vnter den halben ſtam Manaſſe. 8 Denn die Rubeniter vnd Gadditer haben mit dem andern halben Manaſſe jr Erbteil empfangen / das jnen Moſe gab jenſeid dem Jordan gegen dem auffgang / wie jnen dasſelb Moſe der knecht des HERRN gegeben hat / 9 von Aroer an / die am vfer des waſſers bey Arnon ligt / vnd von der Stad mitten im waſſer / vnd alle gegend Medba bis gen Dibon. 10 Vnd alle ſtedte Sihon des königes der Amoriter / der zu Heſbon ſas / bis an die grentze der kinder Ammon. 11 Dazu Gilead vnd die grentze an Geſſuri vnd Maachathi vnd den gantzen berg Hermon / vnd das gantze Baſan / bis gen Salcha. 12 Das gantze Reich Og zu Baſan / der zu Aſtharoth vnd Edrej ſas / welcher noch ein vberiger war von den Riſen / Moſe aber ſchlug ſie vnd vertreib ſie. ^a; Joſu. 1.; Joſu. 18. 13 DJe kinder Jſrael vertrieben aber die zu Geſſur vnd zu Maachath nicht ſondern es wonet beide Geſſur vnd Maachath vnter den kindern Jſrael / bis auff dieſen tag. 14 Aber dem ſtam der Leuiten gab er kein Erbteil / Denn das Opffer des HERRN des Gottes Jſrael iſt jr Erbteil / wie er jnen geredt hat. ^b 15 ALſo gab Moſe dem ſtam der kinder Ruben nach jren Geſchlechten / 16 Das jre Grentze waren / von Aroet die am vfer des waſſers bey Arnon ligt / vnd die Stad mitten im waſſer / mit allem eben felde / bis gen Medba. 17 Heſbon vnd alle jre Stedte die im eben felde ligen / Dibon / BamothBaal / vnd BethBaalMeon. 18 Jahza / Kedemoth / Mephaath. 19 Kiriathaim / Sibma / Zereth-Sahar / auff dem gebirge im tal 20 BethPeor / die Beche am Piſga / vnd Beth Jeſimoth / 21 vnd alle Stedte auff der eben. Vnd das gantze Reich Sihon des königs der Amoriter / der zu Heſbon ſaſſ / den Moſe ſchlug / ſampt den Fürſten Midian / Eui / Rekem / Zur / Hur / vnd Reba / die gewaltigen des königes Sihon / die im Lande woneten. 22 Dazu Bileam den ſon Beor / den Weisſager erwürgeten die kinder Jſrael mit dem ſchwert / ſampt den erſchlagenen. 23 Vnd die grentze der kinder Ruben war der Jordan. Das iſt das Erbteil der kinder Ruben vnter jren Geſchlechten / Stedten vnd Dörffern. ^c 24 DEM ſtam der kinder Gad vnter jren Geſchlechten gab Moſe 25 das jre Grentze waren Jaeſer vnd alle Stedte in Gilead / vnd das halbe Land der kinder Ammon / bis gen Aroer / welche ligt fur Rabbah. 26 Vnd von Heſbon bis gen RamathMizpe vnd Betonim / vnd von Mahanaim bis an die grentze Debir. 27 Jm tal aber Betharam / Beth-Nimra / Sucoth vnd Zaphon / die vbrig war von dem Reich Sihon des königes zu Heſbon / das der Jordan die grentze war / bis ans ende des meers Cinnereth / disſeid des Jordans gegen dem auffgang. 28 Das iſt das Erbteil der kinder Gad in jren Geſchlechten / Stedten vnd Dörffern. 29 DEm halben ſtam der kinder Manaſſe nach jren Geſchlechten gab Moſe / 30 das jr Grentze waren von Mahanaim an / das gantze Baſan / das gantze Reich Og des königes zu Baſan / vnd alle flecken Jair die in Baſan ligen / nemlich ſechzig Stedte. 31 Vnd das halbe Gilead / Aſtharoth / Edrei / die ſtedte des königreichs Ogs zu Baſan / gab er den kindern Machir des ſons Manaſſe das iſt / der helfft der kinder Machir nach jren Geſchlechten. 32 DAs iſt / das Moſe ausgeteilet hat in dem gefilde Moab jenſeid des Jordans fur Jeriho / gegen dem auffgang. 33 Aber dem ſtam Leui gab Moſe kein Erbteil / Denn der HERR der Gott Jſrael iſt jr Erbteil / wie er jnen geredt hat.