Luk 3 | GerLut1545lh | e4.org | J N dem fünffzehenden jar des Keiſerthums Keiſers Tyberij / da Pontius Pilatus Landpfleger in Judea war / vnd Herodes ein Vierfürſt in Galilea / vnd ſein bruder Philippus ein Vierfürſt in Jturea vnd in der gegend Trachonitis / vnd Liſanias ein Vierfürſt zu Abilene /

‏ Luke 3

1 JN dem fünffzehenden jar des Keiſerthums Keiſers Tyberij / da Pontius Pilatus Landpfleger in Judea war / vnd Herodes ein Vierfürſt in Galilea / vnd ſein bruder Philippus ein Vierfürſt in Jturea vnd in der gegend Trachonitis / vnd Liſanias ein Vierfürſt zu Abilene / 2 Da Hannas vnd Caiphas Hoheprieſter waren / Da geſchach der befelh Gottes zu Johannes Zacharias ſon / in der wüſten. 3 VND er kam in alle gegend vmb den Jordan / vnd prediget die Tauffe der buſſe / zur vergebung der ſünde / 4 Wie geſchrieben ſtehet in dem Buch der rede Jeſaias des Propheten / der da ſagt / Es iſt eine ſtimme eines Predigers in der Wüſten / Bereitet den weg des HERRN / vnd machet ſeine ſteige richtig. 5 Alle Tal ſollen vol werden / vnd alle Berge vnd Hügel ſollen ernidriget werden / Vnd was krum iſt / ſol richtig werden / vnd was vneben iſt / ſol ſchlechter weg werden. 6 Vnd alles Fleiſch wird den Heiland Gottes ſehen. ^a 7 DA ſprach er zu dem Volck / das hin aus gieng / das es ſich von jm teuffen lieſſe / Jr Ottern gezichte / Wer hat denn euch geweiſet / das jr dem zukünfftigen zorn entrinnen werdet? 8 Sehet zu / thut rechtſchaffene frucht der Buſſe / Vnd nemet euch nicht fur zuſagen / Wir haben Abraham zum vater. Denn ich ſage euch / Gott kan dem Abraham aus dieſen Steinen Kinder erwecken. 9 Es iſt ſchon die Axt den Bewmen an die wurtzel gelegt. Welcher Bawm nicht gute früchte bringet / wird abgehawen / vnd in das Fewer geworffen. 10 VND das Volck fraget jn / vnd ſprach / Was ſollen wir denn thun? 11 Er antwortet / vnd ſprach zu jnen / Wer zween Röcke hat / der gebe dem / der keinen hat / Vnd wer Speiſe hat / thue auch alſo. 12 ES kamen auch die Zölner / das ſie ſich teuffen lieſſen / vnd ſprachen zu jm / Meiſter / Was ſollen denn wir thun? 13 Er ſprach zu jnen / Foddert nicht mehr / denn geſetzt iſt. 14 DA fragten jn auch die Kriegsleute / vnd ſprachen / Was ſollen denn wir thun? Vnd er ſprach zu jnen / Thut niemand gewalt ^{▼▼Gewalt iſt öffentlicher freuel. Vnrecht / wenn man mit böſen tücken / dem andern ſein Recht verdrückt / vnd ſeine ſache verkeret.} noch vnrecht / vnd laſſet euch benügen an ewrem Solde. 15 ALS aber das Volck im wahn war / vnd dachten alle in jren hertzen von Johanne / Ob er vieleicht Chriſtus were / 16 antwortet Johannes / vnd ſprach zu allen. Jch teuffe euch mit waſſer / Es kompt aber ein Stercker nach mir / dem ich nicht gnugſam bin / das ich die riemen ſeiner Schuch aufflöse / Der wird euch mit dem heiligen Geiſt vnd mit Fewer teuffen. 17 Jn desſelbigen Hand iſt die Wurffſchauffel / vnd er wird ſeine Tennen fegen / Vnd wird den Weitzen in ſeine Schewren ſamlen / Vnd die Sprew wird er mit ewigem Fewer verbrennen. 18 Vnd viel anders mehr vermanet vnd verkündiget er dem Volck. ^c 19 HErodes aber der Vierfürſt / da er von jm geſtrafft ward / vmb Herodias willen / ſeines Bruders weib / vnd vmb alles vbels willen / das Herodes thet / 20 Vber das alles / legt er Johannes gefangen. ^d 21 VND es begab ſich / da ſich alles Volck teuffen lies / vnd Jheſus auch getaufft war / vnd betet / Das ſich der Himel auffthet / 22 vnd der heilige Geiſt fuhr ernidder / in leiblicher geſtalt auff Jn / wie eine Taube / Vnd eine ſtimme kam aus dem Himel / die ſprach / Du biſt mein lieber Son / an dem ich wolgefallen habe. ^e 23 VND Jheſus gieng in das dreiſſigſt jar / Vnd ward gehalten fur einen ſon Joſeph / welcher war ein ſon Eli. ^f 24 Der war ein ſon Mathath. Der war ein ſon Leui. Der war ein ſon Melchi. Der war ein ſon Janna. Der war ein ſon Joſeph. 25 Der war ein ſon Mathathias. Der war ein ſon Amos. Der war ein ſon Nahum. Der war ein ſon Eſli. Der war ein ſon Nange. 26 Der war ein ſon Maath. Der war ein ſon Mathathias. Der war ein ſon Semei. Der war ein ſon Joſech. Der war ein Son Juda. 27 Der war ein ſon Johanna. Der war ein ſon Reſia. Der war ein ſon Zorobabel. Der war ein ſon Salathiel. Der war ein ſon Neri. 28 Der war ein ſon Melchi. Der war ein ſon Addi. Der war ein ſon Koſam. Der war ein ſon Elmadam. Der war ein ſon Her. 29 Der war ein ſon Jeſo. Der war ein ſon Eliezer. Der war ein ſon Jorem. Der war ein ſon Mattha. Der war ein ſon Leui. 30 Der war ein ſon Simeon. Der war ein ſon Juda. Der war ein ſon Joſeph. Der war ein ſon Jonam. Der war ein ſon Eliakim. 31 Der war ein ſon Melea. Der war ein ſon Menam. Der war ein ſon Mathathan. Der war ein ſon Nathan. Der war ein ſon Dauid. 32 Der war ein ſon Jeſſe. Der war ein ſon Obed. Der war ein ſon Boos. Der war ein ſon Salmon. Der war ein ſon Nahaſſon. 33 Der war ein ſon Aminadab. Der war ein ſon Aram. Der war ein ſon Eſrom. Der war ein ſon Phares. Der war ein ſon Juda. 34 Der war ein ſon Jacob. Der war ein ſon Jſaac. Der war ein ſon Abraham. Der war ein ſon Thara. Der war ein ſon Nachor. 35 Der war ein ſon Saruch. Der war ein ſon Ragahu. Der war ein ſon Phaleg. Der war ein ſon Eber. Der war ein ſon Sala. 36 Der war ein ſon Cainan. Der war ein ſon Arphachſad. Der war ein ſon Sem. Der war ein Son Noe. Der war ein ſon Lamech. 37 Der war ein ſon Mathuſala. Der war ein ſon Enoch. Der war ein ſon Jared. Der war ein ſon Maleleel. Der war ein ſon Cainan. 38 Der war ein ſon Enos. Der war ein ſon Seth. Der war ein ſon Adam. Der war Gottes.