Psalms 115
1NJcht vns HERR / nicht vns / ſondern deinem Namen gib Ehre / Vmb deine gnade vnd warheit. 2Warumb ſollen die Heiden ſagen / Wo iſt nu jr Gott? 3Aber vnſer Gott iſt im Himel / Er kan ſchaffcn was er wil. 4JEner Götzen aber ſind ſilber vnd gold / Von Menſchen henden gemacht. a 5Sie haben Meuler vnd reden nicht / Sie haben Augen vnd ſehen nicht. 6Sie haben Ohren vnd hören nicht / Sie haben Naſen vnd riechen nicht. 7Sie haben Hende vnd greiffen nicht / Füſſe haben ſie vnd gehen nicht / Vnd reden nicht durch jren Hals. 8Die ſolche machen ſind gleich alſo / Vnd alle die auff ſie hoffen. 9ABer Jſrael hoffe auff den HERRN / Der iſt jr Hülffe vnd Schild. 10Das haus Aaron hoffe auff den HERRN / Der iſt jr Hülffe vnd Schild. 11Die den HERRN fürchten / hoffen auch auff den HERRN / Der iſt jr Hülffe vnd Schild. 12DEr HERR dencket an vns / vnd ſegenet vns / Er ſegenet das haus Jſrael / Er ſegenet das haus Aaron. 13Er ſegnet die den HERRN fürchten / Beide kleine vnd groſſe. 14Der HERR ſegene euch je mehr vnd mehr / Euch vnd ewre Kinder. 15Jr ſeid die geſegneten des HERRN / Der Himel vnd Erden gemacht hat. 16Der Himel allenthalben iſt des HERRN / Aber die Erden hat er den menſchen Kindern gegeben. 17Die Todten werden dich HERR nicht loben / Noch die hinunter faren in die Stille. 18Sondern wir loben den HErrn / Von nu an bis in ewigkeit / Halelu ia.
Copyright information for
GerLut1545lh