Deu 21 | GerLut1545lh | e4.org | W Enn man einen Erſchlagenen findet im Lande / das dir der HERR dein Gott geben wird einzunemen / vnd ligt im Felde / vnd man nicht weis / wer jn geſchlagen hat.

‏ Deuteronomy 21

1 WEnn man einen Erſchlagenen findet im Lande / das dir der HERR dein Gott geben wird einzunemen / vnd ligt im Felde / vnd man nicht weis / wer jn geſchlagen hat. 2 So ſollen deine Elteſten vnd Richter hin aus gehen / vnd von dem Erſchlagenen meſſen an die Stedte die vmbher ligen. 3 Welche Stad die neheſt iſt / derſelben Elteſten ſollen eine junge Kue von den rindern nemen / da mit man nicht geerbeitet hat / noch am Joch gezogen hat / 4 Vnd ſollen ſie hin ab füren in einen kieſichten Grund / der weder geerbeitet noch beſeet iſt / vnd daſelbs im grund jr den Hals abhawen. 5 DA ſollen erzu komen die Prieſter / die kinder Leui (Denn der HERR dein Gott hat ſie erwelet / das ſie jm dienen vnd ſeinen Namen loben / vnd nach jrem Mund ſollen alle ſachen vnd alle ſcheden gehandelt werden) 6 Vnd alle Elteſten derſelben Stad ſollen erzu tretten zu dem Erſchlagenen / vnd jre hende waſſchen vber die junge Kue / der im grund der hals abgehawen iſt / 7 Vnd ſollen antworten / vnd ſagen / Vnſer hende haben dis Blut nicht vergoſſen / ſo habens auch vnſer augen nicht geſehen. 8 Sey gnedig deinem volck Jſrael / das du der HERR erlöſet haſt / lege nicht das vnſchüldige blut auff dein volck Jſrael / So werden ſie vber dem blut verſünet ſein. 9 Alſo ſoltu das vnſchüldige blut von dir thun / das du thuſt was recht iſt fur den Augen des HERRN. 10 WEnn du in einen ſtreit zeuchſt wider deine Feinde / vnd der HERR dein Gott gibt dir ſie in deine hende / das du jre Gefangen wegfüreſt. 11 Vnd ſiheſt vnter den gefangenen ein ſchön Weib / vnd haſt luſt zu jr / das du ſie zum weibe nemeſt / 12 So füre ſie in dein Haus / vnd las jr das Har abſcheren / vnd jre Negel beſchneiten / 13 vnd die Kleider ablegen / darinnen ſie gefangen iſt / vnd las ſie ſitzen in deinem Hauſe / vnd beweinen einen mond lang jren Vater vnd jre Mutter / Darnach ſchlaff bey jr vnd nim ſie zu der Ehe / vnd las ſie dein weib ſein. 14 Wenn du aber nicht luſt zu jr haſt / ſo ſoltu ſie auslaſſen / wo ſie hin wil / vnd nicht vmb gelt verkeuffen noch verſetzen / Darumb das du ſie gedemütiget haſt. 15 WEnn jemand zwey Weiber hat / Eine die er lieb hat / vnd eine die er haſſet / vnd ſie jm Kinder geberen / beide die Liebe vnd die Feindſelige / das der Erſtgeborner der Feindſeligen iſt / 16 Vnd die zeit kompt / das er ſeinen Kindern das Erbe austeile / So kan er nicht den Son der Liebeſten zum erſtgebornen Son machen / fur den erſtgebornen Son der Feindſeligen. 17 Sondern er ſol den Son der Feindſeligen fur den erſten Son erkennen / das er jm zweifeltig gebe / alles das furhanden iſt / Denn derſelbe iſt ſeine erſte Krafft / vnd der erſten geburt Recht iſt ſein. 18 WEnn jemand einen eigenwilligen vnd vngehorſamen Son hat / der ſeiner Vater vnd Mutter ſtim nicht gehorcht / vnd wenn ſie jn züchtigen / jnen nicht gehorchen wil. 19 So ſol jn ſein Vater vnd Mutter greiffen / vnd zu den Elteſten der ſtad füren / vnd zu dem Thor desſelben orts / 20 vnd zu den Elteſten der ſtad ſagen / Dieſer vnſer Son iſt eigenwillig vnd vngehorſam / vnd gehorcht vnſer ſtim nicht / vnd iſt ein Schlemmer vnd Trunckenbolt. 21 So ſollen jn ſteinigen / alle Leute der ſelbigen ſtad / das er ſterbe / Vnd ſolt alſo den Böſen von dir thun / das es gantz Jſrael höre vnd ſich fürchte. 22 WEnn jemand eine Sünde gethan hat / die des Tods wirdig iſt / vnd wird alſo getödt / das man jn an ein Holtz henget. 23 So ſol ſein Leichnam nicht vber nacht an dem holtz bleiben / Sondern ſolt jn desſelben tags begraben / Denn ein Gehenckter iſt verflucht bey Gott / Auff das du dein Land nicht verunreinigſt / das dir der HERR dein Gott gibt zum Erbe. ^a