Jer 20 | GerLut1545lh | e4.org | D A aber PasHur ein ſon Jmmer des Prieſters / ſo zum öberſten im hauſe des HERRN geſetzt war / Jeremiam hörete ſolche wort weisſagen /

‏ Jeremiah 20

1 DA aber PasHur ein ſon Jmmer des Prieſters / ſo zum öberſten im hauſe des HERRN geſetzt war / Jeremiam hörete ſolche wort weisſagen / 2 ſchlug er den Propheten Jeremiam / vnd warff jn ins Gewelbe vnter dem öberthor BenJamin / welchs am hauſe des HERRN iſt. 3 VND da es morgen ward / zoch Paſhur ^{▼▼PASHUR / Kompt her von Pas / das heiſſt / breit / vnd Hur / weis.} Jeremiam aus dem Gewelb / Da ſprach Jeremia zu jm / der HERR heiſſet dich nicht Paſhur / ſondern Magur ^{▼▼MAGUR / Heiſt furcht. So verkeret nu Jeremias dem ſeinen namen. Als ſolt er ſagen / Du ſolt nicht ſo gros / breit vnd weis her gehen / wie dein name laut / Sondern furcht vnd ſchrecken ſol vmb vnd vmb dich her ſein / das es enge vnd ſchwartz gnug vmb dich ſey.} vmb vnd vmb. 4 Denn ſo ſpricht der HERR / Sihe / Jch wil dich ſampt allen deinen Freunden / in die furcht geben / vnd ſollen fallen durchs ſchwert jrer Feinde / das ſoltu mit deinen augen ſehen / Vnd wil das gantze Juda in die hand des Königes zu Babel vbergeben / der ſol ſie wegfüren gen Babel / vnd mit dem ſchwert tödten. 5 Auch wil ich alle güter dieſer Stad ſampt allem das ſie geerbeitet / vnd alle Kleinot / vnd alle Schetze der könige Juda / in jrer Feinde hand geben / das ſie die ſelbigen rauben / nemen vnd gen Babel bringen. 6 Vnd du Paſhur ſolt mit allen deinen Hausgenoſſen / gefangen gehen vnd gen Babel komen / Da ſelbs ſoltu ſterben vnd begraben werden / ſampt allen deinen Freunden / welchen du Lügen predigeſt. 7 HERR / Du haſt mich vberredt ^{▼▼Das ich ſolch predigamt habe an genomen / vnd ich nicht gewuſt / das die Leute ſo böſe weren / vnd das predigen ſo viel vnd groſſe fahr hette.} / vnd ich hab mich vberreden laſſen / Du biſt mir zu ſtarck geweſt / vnd haſt gewonnen / Aber ich bin drüber zum Spot worden teglich / vnd jederman verlachet mich. 8 Denn ſint ich geredt / geruffen vnd gepredigt habe / von der plage vnd verſtörung / iſt mir des HERRN wort / zum hohn vnd ſpot worden teglich. 9 Da dacht ich / Wolan / ich wil ſein nicht mehr gedencken / vnd nicht mehr in ſeinem Namen predigen / Aber es ward in meinem Hertzen / wie ein brennend Fewr in meinen Gebeinen verſchloſſen / das ichs nicht leiden kundte / vnd were ſchier vergangen. 10 DEnn ich höre / wie mich viel ſchelten / vnd allenthalben ſchrecken / Hui verklagt jn / Wir wollen jn verklagen (ſprechen alle meine Freunde vnd Geſellen) ob wir jn vberforteilen / vnd jm beykomen mügen / vnd vns an jm rechen. 11 Aber der HERR iſt bey mir / wie ein ſtarcker Held / Darumb werden meine Verfolger fallen / vnd nicht obliegen / Sondern ſollen ſeer zu ſchanden werden / Darumb / das ſie ſo törlich handeln / Ewig wird die ſchande ſein / der man nicht vergeſſen wird. 12 Vnd nu HERR Zebaoth / der du die Gerechten prüfeſt / nieren vnd hertz ſiheſt / Las mich deine rache an jnen ſehen / Denn ich habe dir meine ſache befolhen. 13 Singet dem HERRN / rhümet den HERRN / der des Armen leben aus des Boshafftigen hende erretttet. 14 VErflucht ſey der tag / darinn ich geboren bin / Der tag müſſe vngeſegenet ſein / darinn mich meine Mutter geboren hat. 15 Verflucht ſey der / ſo meinem Vater gute Botſchafft bracht / vnd ſprach / Du haſt einen jungen Son / das er jn frölich machen wolt. 16 Derſelbige Man müſſe ſein / wie die Stedte / ſo der HERR vmbgekeret / vnd jn nicht gerewen hat / vnd müſſe des morgens hören ein geſchrey / vnd des mittages ein heulen. 17 Das du mich doch nicht getödtet haſt in Mutterleibe / das mein Mutter mein Grab geweſen / vnd jr Leib ewig ſchwanger blieben were. 18 Warumb bin ich doch aus Mutterleibe erfur komen / Das ich ſolch jamer vnd hertzenleid ſehen mus / vnd meine tage mit ſchanden zubringen. Hiob. 3; ^d